قدمي لينا راسك ؟ -

الاسم ديالي فردوس زلمدي، من مواليد  01/02/1999، كبرت في مدينة الدار البيضاء لكن الأصل ديالي من شتوكة أيت باها. من ديما كانت العائلة ديالي كتسميني بزاف ديال الألقاب منها فيفي، دودو، دودوس و خصوصا الأب ديالي اللي كان  كيسميني ميلفايا حيت ديما كيكتاشف فشخصيتي جوانب جديدة اللي كتعجبو و من هنا جا اسم الشهرة و بديت صناعة المحتوى فشهر غشت 2020

كيفاش جاتك الفكرة تبداي يوتيوب ؟ -

من عام 2016 و أنا عندي الفكرة نبدا صناعة المحتوى و تكون هدي هي المهنة ديالي و بالخصوص نكون يوتوبرز لكن فداك الوقت  فاش هضرت مع الأخوات ديالي متحمسوش بزاف للفكرة حيت كانت كتبان مستبعدة أو حتى مستحيلة  فمعاودتش تكلمت فالموضوع حتى سنة 2020 بعدما تشاورت مع أختي سارة و شجعتني ندير الخطوة الأولى

شنونوع المحتوى اللي تميزتي بيه ؟ -

المحتوى ديالي كيركز على اكتشاف الذات و كنبين من خلاله أهمية أن الشخص يلقى راسه، فأنا بطبعي إنسانة بيتوتية مكنخرجش بزاف لذلك مجربتش بزاف ديال الحاجات فحياتي و هادشي علاش قررت نخوض تجارب جديدة و ندي معايا الناس اللي متابعيني من خلال الفيديوهات ديالي

واش الويب هو مصدر الربح ديالك الوحيد ؟ -

نعم الويب هو مصدر الربح ديالي  و هدا كان الحلم ديالي لأنه مند الصغر و أنا باغا تكون المهنة ديالي صناعة المحتوى و ماشي شي حاجة أخرى . هدا لايمنع أنه فالأول دوزت ما يقارب سنة و نصف بدون أي ربح لكن كنت متأكدة أنه عندي القدرة أنني ننجح وها أنا الآن عايشة من هادشي اللي كندير، وهدا يؤكد أن صناعة المحتوي راها مهنة كباقي المهن و كتطلب منا و قت و مجهود كبير

شنو رأيك فقرار فرض ضريبة على اليوتوبرز ؟ -

أنا مع أداء الضريبة إلى كان هادشي أيخلي الدولة تعترف بصناعة المحتوى كمهنة و يكونو تسهيلات للناس اللي كتخدم فهاد المجال أو شي دعم لأنه كما سبقلي قلت خاصك تخدم على الأقل سنة بدون أي مدخول عاد ممكن تبدا توصل بالأرباح. لكن إدا كنا أنعانيو من نفس المشاكل ديال معندناش الحق نصورو فالزنقة، نحطو لوازم التصوير باش منصوروش الناس معانا…و مكاينش مساعدة فالفيزا و بزاف ديل الأمور فهنا أنكون ضد

واش كتلقاي انتقادات و كيفاش كتعاملي معها ؟ -

أي شخص كيتلقا انتقادات فحياته اليومية من عند الناس اللي دايرين بيه بحال الصحاب، العائلة، الجيران، المدرسة… لكن طالما عارفة راسي أشنو باغا هادشي مكيبرزطنيش بزاف، واخا كيجيو بعد المرات لحظات ضعف فاش كتكون شي حاجة اللي تقدر تجرحك و تخسر ليك نهارك لكن على العموم تعلمت من تجربتي الصغيرة أنه الانتقادات أنلقاهم فينما مشيت داكشي علاش مخصنيش نخليهوم يأثرو فيا

شفناك في الغناء و الأغاني اللي اصدرتي لقاو نجاح كبير، قربينا أكثر من هاد التجربة ؟  -

الغناء كان هواية ديالي منذ كانت عندي 10 سنوات لأنه كانو أخواتي كيغنيو فدار و كنت حتا أنا بغا نغني بحالهم فبديت كنغني فالحفلات المدرسية، من بعد وليت كنجرب نكتب أغاني ديالي و لا ندير تعديلات فبعض الأغاني اللي كنسمع باش نحس بيهم أكثر و داكشي علاش منين بديت صناعة المحتوى قلت ضروري نحقق حتى هاد الحلم ديال الغناء و بالفعل تمكنت من أنني نعبر على أفكاري و الأحاسيس ديالي للناس من خلال الأغاني اللي انتجت و كانت هدي أيضا وسيلة نوصل بها الفكرة ديالي و نفرق بيها بين شخصيتي المرحة و شخصيتي الجادة

شنو كتفضلي فردوس المغنية أم صانعة المحتوى ؟ -

بصراحة بزوج لأنهم بزوج كيمثلوني

شنو سبب غيابك على يوتيوب مؤخرا ؟ -

الموسيقى خدات مني شوية دالوقت فبعدت على يوتوب مؤخرا لكن أنا راجعة بقوة وكنحاول نتأقلم مع صناعة المحتوى و الغناء لأنه صعيب من الأول توفق بيناتهم

واش كتوجدي شي حاجة جديدة ؟ -

نعم كنوجد بزاف ديال الحاجات جداد سواء في صناعة المحتوى أو في الغناء فترقبو إنشاء الله الجديد قريبا